સરદાર નગરી બારડોલીમાં શિયાળુ વ્યંજન પોંક ના ભાવ આસમાને પહોંચ્યા
( બારડોલીમાં મળતું વલસાડી ઉબાડીયું એનઆરઆઈ નાગરિકોની પસંદ બન્યું )
શિયાળાના આગમન સાથે સ્વાદ રસિકોને લોભાવતા વ્યંજન પોંક નું બજાર બારડોલીમાં શરૂ થઈ ગયું છે. સુરત શહેર બાદ ગત વર્ષોમાં બારડોલીમાં પણ પોંક બજાર વીકસ્યું છે.
શિયાળાની ઋતુનો મનગમતો વાની નો પોંક બારડોલી પ્રદેશ સહિત આસપાસના વિસ્તારોના રહીશો અને વિશેષ કરીને માદરે વતન પધારતા એન આર આઈ નાગરિકો માટે અત્યંત પ્રિય નાસ્તો બની રહેતા બારડોલીના ધુલિયા ચાર રસ્તા નજીક કુમળી જુવાર ના પોંક નું મોટું બજાર વિકસ્યું છે. આ વર્ષે એન આર આઈ પરિવારો પણ મોટી સંખ્યામાં બારડોલી પ્રદેશમાં આવ્યા છે. પરંતુ કાચા માલની અછતના કારણે પોક ના ભાવ રૂ.૮૦૦ પ્રતિ કિલો રહેતા શોખીનો ના સ્વાદ મોળા પડ્યા છે. પોંક સાથે ખવાતી વિવિધ સેવ ના ભાવો પણ રૂ.૪૦૦ પ્રતિ કિલોએ પહોંચ્યા છે. ગત વરસોની સરખામણીમાં આ વર્ષે કિલો દીઠ રૂ.૩૦૦ ના ભાવ વધારા માટે આ વર્ષે જૂની કિકવાડ, ભાટલાવ વિસ્તારોમાં જુવાર નો પાક નહિવત જણાતા કાચા માલની ભારે અછત ના કારણે ભાવ વધવા પામ્યા હોવાનું જણાયું છે. પોંક ઉત્પાદકો ના જણાવ્યા પ્રમાણે ઋતુચક્ર માં ફેરફાર ના કારણે જુવારના પાકનો ઉતાર ઘણો ઓછો છે. પોંકની સીઝન માર્ચ મહિના સુધી ચાલુ રહેશે છતાં પણ કાચા માલની અછત ના કારણે અઠવાડિયાના અમુક દિવસો દરમિયાન પોંક બજાર બંધ રહેવાની શક્યતા જણાઈ રહી છે. બીજી તરફ બારડોલીમાં હવે વલસાડનું પ્રસિદ્ધ ઉબાડિયું પણ મળતું થયું છે. માટીના માટલામાં રતાળુ બટાકા પાપડી વગેરે વિવિધ મસાલાઓ સાથે ભેળવી ઉપર કલાર ના છોડ થી ઢાંકી દેશી પદ્ધતિથી તૈયાર થતું માટલા ઉબાડીયું બારડોલીમાં રું.૩૦૦ પ્રતિ કિલો ના ભાવે વેચાઈ રહ્યું છે. કુદરતી કારણોસર ભાવ વધારો હોવા છતાં બારડોલી પ્રદેશમાં લોકો પોંક અને ઉબાડીયા ની લિજ્જત માણવા ઉમટી રહ્યા છે
